La cabala del gnoco
Eco qua, mondo pitoco, la gran cabala del gnoco!
Drita in mèso a la cusina, co la càpola de gala, me comare moscardina, la se giusta la grembiala,
che bisogna celebrar el gran Vendri gnocolar!
Come capita el bon estro, co na ociada da maestro, la marida a poco a poco, la farina a la patata e da forte inamorata, la manipola el paston!
Che el marcia in bigoli, longhi e sotili ben tenarini, come che va
E ogni tanto na bela infarinà!
Fin, che via i rùgola, tochi e tocheti, oh che gnocheti, che nassarà!
E ogni tanto na bela infarinà!
E ti laora, gratacasola, daghe el miracolo de la parola; faghe i so brufoli a fior de pansza, che in esultansa i ridarà
E ogni tanto na bela infarinà!
Desteso in rango Su la toaia, sto fido popolo, che mai no sbaia,
che a meszogiorno sfida el canon;
sereno intrepido chieto onfà l'oio, che speta el boio del caldieron..!
E ti lavora gratacasola, daghe el miracolo de la parola grata el formaio, sensza creansa, che el se ghe intrufola, drento la pansa.
E ti destrìghete butier balosso: spiuma,desfrìsete, sàlteghe adosso.
pronti, el risponde rosso brusà:
Zzzzzzzz- che el sìsola
Gnochi, son qua!
VVVVVVVVVVVVVVVVVVVV
L'amor l'è mato
L'amor l'è mato come la farfala, la farfala che va de quà e de là, intorno ai lumi de una bela sala, 'rente a çéste e ai banchi del marcà.... Se fa l'amor sul pato de la scala, su le banchete fora de çità, col cor in carneval, che bala e bala, col naso in aria e la boca tirà. Se fa l'amor, col colo oltà in suso, de soto a un pontesel che ne fa el muso, se fa l'amor parlandose da un buso. Sora el sofà, magnandose co i oci, le man in man, la testa su i zenoci, verdi de voja come du fenoci!
Nessun commento:
Posta un commento